ᐊᑎᖅᓯᐅᕐᓂᕐᒥᒃ ᐱᓕᕆᐊᖃᕐᓂᖅ

ᐃᓄᒃᑎᑐᑦ ᐅᖃᐅᓯᖅ

ᐃᓄᒃᑎᑐᑦ: ᐃᓅᑉ ᐱᐅᓯᖓᑐᑦ

ᔩᓚ ᐸᓪᓗᖅ

ᐃᓄᒃᑎᑐᑦ ᐃᓄᖕᓄᑦ ᐅᖃᐅᓯᕆᔭᐅᔪᖅ ᐅᑭᐅᖅᑕᖅᑐᒥᐅᓄᑦ. ᐊᑐᖅᑕᐅᕙᒃᖢᓂ ᓴᐃᐱᐅᕆᐊᒥ, ᐊᓛᔅᑲᒥ, ᑲᓇᑕᒥ ᐊᒻᒪᓗ ᑲᓛᖦᖠᑦ ᓄᓈᓐᓂ. ᐃᓄᒃᑎᑐᑦ ᐅᖃᐅᓯᖅ ᐊᔾᔨᒌᙱᑦᑐᓂᒃ ᐅᖃᓪᓚᐅᓯᖃᐅᖅᖢᓂ ᐊᑐᖅᑕᐅᕙᒃᑐᖅ ᓄᓇᓕᖃᑎᒌᒥᐅᓂ, ᐊᔾᔨᒌᙱᐊᕐᔪᒃᑕᖅᖢᑎᒃ. ᐊᕐᕌᒍᒐᓴᕐᔪᐊᓄᑦ, ᑭᖑᕚᕇᖕᓄᑦ ᐅᓂᒃᑳᑦ ᐅᓂᒃᑳᖅᑐᐊᓪᓗ ᑲᔪᓯᑎᑕᐅᓯᒪᔪᑦ ᐅᖃᐅᓰᓐᓇᒃᑯᑦ ᐃᙱᐅᓯᒃᑯᓪᓗ. ᖃᓪᓗᓈᓄᑦ ᐅᐸᒃᑕᐅᓚᐅᖅᑎᓪᓗᒋᑦ ᐅᒃᐱᓕᖅᑎᑦᑎᓇᓱᒃᑐᓄᑦ, ᐃᓄᐃᑦ ᐅᑭᐅᖅᑕᖅᑐᒥᐅᑦ ᑎᑎᕋᐅᓯᖅᑖᖅᑎᑕᐅᓚᐅᖅᓯᒪᔪᑦ, ᐸᐃᑉᐹᖁᑎᓂᒃ ᐅᖃᓕᒫᕈᓐᓇᖁᔭᐅᓪᓗᑎᒃ. ᐃᓄᐃᑦ ᐅᑭᐅᖅᑕᖅᑐᒥᐅᑦ ᐊᑕᐅᑦᑎᒃᑯᑦ ᖃᓪᓗᓈᓄᑦ ᐅᐸᒃᑕᐅᓚᐅᖏᓐᓂᖏᓐᓄᑦ, ᐊᔾᔨᒌᙱᑦᑐᓂᒃ ᑎᑎᕋᐅᓯᖃᓕᓚᐅᖅᑐᑦ. ᐅᓪᓗᒥ, ᐃᓄᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᕐᒥᐅᑕᐃᑦ ᐊᑐᖅᐸᒃᑐᑦ ᖃᓕᐅᔮᖅᐸᐃᓂᒃ (ᖃᓪᓗᓈᑦ ᑎᑎᕋᐅᓯᖓ ᐊᑐᖅᖢᒍ) ᐅᕝᕙᓘᓐᓃᑦ ᖃᓂᐅᔮᖅᐸᐃᑎᑐᑦ (ᐃᓄᒃᑎᑐᑦ), ᐃᓛᓐᓂᓗ ᑕᒪᐃᓐᓂᒃ ᐊᑐᖅᐸᒃᖢᑎᒃ.

ᓯᕗᓪᓕᖅᐸᐅᓪᓗᑎᒃ ᑎᑎᕋᐅᓯᖃᓕᓚᐅᖅᑐᑦ ᖃᓕᐅᔮᖅᐸᐃᑎᑐᑦ ᑲᓛᖦᖠᑦ ᓄᓈᓐᓂ 1760ᖏᓐᓂ. ᐊᕐᕌᒍᐃᑦ ᐊᓂᒍᖅᐸᓪᓕᐊᑎᓪᓗᒋᑦ ᑎᑎᕋᐅᓯᖅ ᐊᓯᔾᔨᖅᑕᐅᕙᓪᓕᐊᓚᐅᖅᑐᖅ ᑐᒃᓯᐊᖅᑎᓄᑦ ᐅᖃᐅᓯᓕᕆᔨᓄᓪᓗ, ᐱᒋᐊᙵᕈᑕᐅᓚᐅᖅᓯᒪᔪᒥᒃ ᓱᓕ ᑐᙵᕕᖃᖅᖢᑎᒃ ᑎᑎᕋᐅᓯᖃᖅᑐᑦ ᒫᓐᓇ.

ᒧᕆᕕᐊᓐ ᑐᒃᓯᐊᖅᑏᑦ, ᑲᓛᖦᖠᑦ ᓄᓈᓐᓄᐊᖅᑳᓚᐅᖅᓯᒪᔪᑦ ᑭᖑᓂᐊᒍᑦ ᓛᐸᑐᐊᕆᒧᐊᕋᒥᒃ 1800ᖏᓐᓂ ᑲᓛᖦᖠᑦ ᑎᑎᕋᐅᓯᖏᑕ ᐊᔾᔨᐸᓗᖏᓐᓂᒃ ᑎᑎᕋᐅᓯᖃᓕᖅᑎᑦᑎᓚᐅᖅᓯᒪᔪᑦ. ᐊᓛᔅᑲᒥᐅᑦᑕᐅᖅ ᓴᐃᐱᐅᕆᐊᒥᐅᓪᓗ ᖃᓕᐅᔮᖅᐸᐃᑎᑐᑦ ᑎᑎᕋᐅᓯᖃᕐᒥᔪᑦ. ᐊᓛᔅᑲᒥᐅᑐᐊᑦᑎᐊᑦ ᐊᔾᔨᙳᐊᑎᒍᑦ ᑎᑎᕋᐅᓯᓕᐅᕋᓱᓚᐅᖅᓯᒪᔪᑦ, ᑭᓯᐊᓂ ᑖᓐᓇ ᑎᑎᕋᐅᓯᓕᐊᖑᓇᓱᐊᖅᑐᖅ ᑲᔪᓯᓚᐅᖅᓯᒪᙱᑦᑐᖅ ᑎᑎᕋᐅᓯᓕᐅᕋᓱᐊᖅᑐᑦ ᐃᓅᔪᓐᓃᖅᑎᓪᓗᒋᑦ.

ᑲᓇᑕᐅᑉ ᑲᓇᖕᓇᖓᓐᓂᕐᒥᐅᑦ ᐃᓄᐃᑦ ᑭᖑᓪᓕᖅᐸᐅᓪᓗᑎᒃ ᑎᑎᕋᐅᓯᖃᓕᖅᑎᑕᐅᓚᐅᖅᓯᒪᔪᑦ, ᑖᒃᑯᐊᑐᐊᓪᓗ ᖃᓂᐅᔮᖅᐸᐃᑎᑐᑦ ᑎᑎᕋᐅᓯᖃᖅᖢᑎᒃ. ᐱᒋᐊᖅᑎᑕᐅᓪᓗᑎᒃ ᑐᒃᓯᐊᖅᑎᓄᑦ ᐊᔾᔨᐸᓗᖓᓐᓂᒃ ᑎᑎᕋᐅᓯᓕᐅᓚᐅᖅᑐᕕᓂᕐᓄᑦ ᐊᓪᓚᓄᑦ, ᖃᓂᐅᔮᖅᐸᐃᑎᑐᑦ ᑎᑎᕋᐅᓯᖅ 1860ᖏᓐᓂ ᐱᒋᐊᖅᑎᑕᐅᓚᐅᖅᑐᕕᓂᖅ. ᐃᓄᐃᑦᓇᑦᓯᓕᖕᒥᐅᑦ, ᐊᕐᕕᓕᒡᔪᐊᕐᒥᐅᑦ ᐊᒻᒪᓗ ᕿᑭᖅᑖᓘᑉ ᖁᑦᑎᒃᑐᖓᓂᕐᒥᐅᑦ ᑭᖑᓪᓕᖅᐸᐅᓪᓗᑎᒃ ᑐᒃᓯᐊᖅᑎᓄᑦ ᐅᐸᒃᑕᐅᓚᐅᖅᓯᒪᔪᕕᓃᑦ 1900 ᐱᒋᐊᓕᓵᖅᑎᓪᓗᒍ ᑭᖑᓪᓕᖅᐸᐅᓪᓗᑎᒡᓗ ᖃᓂᐅᔮᖅᐸᐃᑎᑐᑦ ᑎᑎᕋᐅᓯᖃᓕᖅᑎᑕᐅᓪᓗᑦ 1920ᖏᓐᓂ.

ᐅᓪᓗᒥ, ᐃᓄᐃᑦ >ᓄᓇᓕᖃᑎᒌᙱᑦᑐᑦ ᐊᔾᔨᒌᙱᑦᑐᓂᒃ ᐅᖃᓪᓚᐅᓯᖃᖅᑐᑦ ᐃᓄᒃᑎᑐᑦ. ᐃᓚᖏᑦ ᐊᔾᔨᒌᙱᓐᓂᖏᑦ ᓂᓪᓕᐊᓂᖏᑦᑎᒍᑐᐃᓐᓇᐅᔪᑦ, ᐃᓚᖏᓪᓗ ᐊᓯᖏᓐᓂᑦᑎᐊᒻᒪᕆᒃ ᐅᖃᐅᓯᖃᖅᖢᑎᒃ. ᐃᓚᖏᑦ ᓄᓇᓕᖃᑎᒌᙱᑦᑐᑦ ᐃᒻᒥᖕᓂᒃ ᑐᑭᓯᐅᒪᖃᑎᒌᖕᓂᖅᓴᐅᔪᑦ ᐃᓚᖏᓪᓗ ᑐᑭᓯᐅᒪᖃᑎᒌᙱᑦᑎᐊᑲᓴᒃᖢᑎᒃ. ᓲᕐᓗ, ᕿᑭᖅᑖᓗᖕᒥᐅᑦ ᓴᐃᐱᐅᕆᐊᒥᐅᓂᒃ ᑐᑭᓯᐊᔪᓐᓇᙱᖦᖢᑎᒃ, ᓴᐃᐱᐅᕆᐊᒥᐅᑦ ᐊᓛᔅᑲᒥᐅᓄᑦ ᑐᑭᓯᐊᔭᐅᓂᖅᓴᐅᓪᓗᑎᒃ. ᐅᖃᓪᓚᐅᓰᑦ ᐊᔾᔨᒌᙱᓐᓂᖏᑦ ᐊᒃᓱᕈᕐᓇᐅᑕᐅᒐᓗᐊᖅᑎᓪᓗᒋᑦ ᐅᖃᐅᓰᑦ ᓂᐱᖏᑦ ᐊᔾᔨᐅᙱᓐᓂᖏᑦ ᐅᒃᐱᓕᖅᑎᑦᑎᓇᓱᐊᖅᑐᓄᑦ ᐊᒃᓱᕈᕐᓇᐅᑕᐅᓚᐅᕐᒥᔪᑦ ᖃᓪᓗᓈᑐᑦ ᓂᐱᖏᑦᑕ ᐊᔾᔨᒋᙱᓗᐊᕐᓂᖏᓐᓄᑦ. ᑕᐃᒪᐃᓐᓂᖓᓄᓪᓗ ᐊᑎᖏᑦ ᑕᐃᒪᓐᓇᑦᑎᐊᖅ ᑎᑎᕋᖅᑕᐅᕙᓚᐅᙱᑦᑐᑦ. ᑭᖑᓂᐊᒍᑦ ᐊᔾᔨᓕᐅᕆᔩᑦ ᐅᑭᐅᖅᑕᖅᑐᒧᑦ ᑎᑭᖃᑦᑕᓕᖅᑎᓪᓗᒋᑦ ᐃᓄᖕᓂᒃ ᐊᔾᔨᓕᐅᕆᔭᖅᑐᖅᖢᑎᒃ, ᐃᓄᒃᑎᑐᑦ ᓂᐱᖏᓐᓂᒃ ᖃᐅᔨᒪᙱᒧᑦ, ᐊᑎᖏᓐᓂᒃ ᑎᑎᕋᖅᑎᐊᖅᐸᙱᑦᑐᕕᓃᑦ. ᕿ ᖁ ᖃ-ᑦ, ᑭ ᑯ ᑲ-ᙳᖅᑎᑕᐅᕙᒃᖢᑎᒃ ᐊᒻᒪᓗ ᕆ ᕈ ᕋᑦ, ᒋ ᒍ ᒐ- ᙳᖅᑎᑕᐅᕙᒃᖢᑎᒃ ᐊᒻᒪᓗ ᐃᓄᐃᑦ ᐊᑎᖏᑦ ᐃᓛᓐᓂ ᓄᓇᖅᑲᑎᒌᙱᑦᑐᓄᑦ ᐊᔾᔨᒌᙱᑦᑐᓂᒃ ᑕᐃᔭᐅᕙᖕᒪᑕ, ᑕᒪᓐᓇ ᐊᒃᓱᕈᕐᓇᕈᑕᐅᒃᑲᓐᓂᓚᐅᕆᓪᓗᓂ.

ᓄᓇᖅᑲᑎᒌᙱᑦᑐᑦ ᐅᖃᓪᓚᐅᓯᖏᑦ ᑎᑎᕋᐅᓯᖏᓪᓗ ᐊᔾᔨᒌᙱᒃᑲᓗᐊᖅᑎᓪᓗᒋᑦ, ᐃᓄᐃᑦ ᐅᖃᐅᓯᖏᑦ ᐊᑕᐅᓯᕐᒥᓐᖔᖅᑐᑦ ᑕᐃᒪᙵᓂᐊᓗᒡᓗ ᐊᑐᖅᑕᐅᓯᒪᓪᓗᑎᒃ.